أحمد«D.J» المولود في فيصل ويعمل ويقيم في المرج

من زمان وانا أكل عيشي الفرحة.. من أيام الجامعة كانت أي حفله ملهاش طعم من غيري، احترفت الهيصة وكسبت منها فلوس من أيام ما كنت طالب، ولما اتخرجت كان أي واحد من أصحابي أو معارفي عنده فرح لازم يسأل عني ويعرف معاد أجازتي علشان يرتب معايا باعتباري أهم واحد في المدعوين وكنت دايماً باقولهم (أنا الفرح والفرح أنا).
كتب: صلاح الناجي
أحمد رشدي، عندما عرفني بنفسه قال: «أنا أحمد D.J من مواليد فيصل لكني أقيم وأعمل بالمرج»، كنت أشعر وهو يحدثني أنني أمام شاب مختلف، كل مرحلة في حياته رقصة وغنوة، ولما سألته: إيه حكاية مواليد فيصل وتقيم وتعمل بالمرج، قال: أنا أحب أعرف نفسي كده دايماً لأسباب عاطفية، أصل كنت بحب واحدة من شارعنا في فيصل لكن الظاهر إنها كانت بتحبني مجامله، لما إتقدمت ليها قالتلي: ما ينفعش .. قلتلها ليه؟
قالت لي: شغلتك!
قلت لها : إشمعني؟
قالت لي: الناس قلتلها: مالهم.
قالت لي: ما ينفعش وخلاص
حسيت بجرح كبير قفلت المحل بتاعي في الحتة ومشيت، جيت علي هنا في المرج لأنه ما ينفعش أرقص وأهيص وأنا شايف عينيها بتقولي ليه كده، أنا أكل عيشي كده، وهو انا يعني كنت هاتجوزها إزاي، من فلوس الهيصه طبعاً، أنا أكل عيشي الهيصة، أول مشروع فتحته بعد التخرج كان محل فاضي، وكان راس مالي فيه اسمي، كتبت بس علي اليافطة «أحمد D.J» كنت دايماً فاتح المحل ومش قاعد فيه، دايماً مشغول زفاف وخطوبة وحفل نجاح أو رحلة، والمحل رغم إنه كان دايماً مفتوح ما كانش فيه حاجة تتسرق غير لمبة مازغللتش عين حد يسرقها، بعد فترة اشتريت كمبيوتر، وسماعتين كبار وخلاص، كنت باتعامل مع الدنيا كأني صاحب مشروع وصنعة، كنت حاسس إني باعمل خير للناس، وللشباب (الفانكي) اللي مالهومش قيمة، كنت باجمعهم من القهاوي، وأعملهم قيمة وأقبضهم كمان بعد ما يزفوا أي عروسة، أنا بعد ما خلصت الجيش بسنة وأول ما فتحت المحل ده أسست فرقة زفة وكان اسمها (الفانكي معاك) لما سألته يعني إيه (الفانكي) قال: دول الشباب (البيور) يعني المخلص اللي قاعد علي القهاوي ملوش شغلة، ولا مشغلة والهم قاتلهم وحاطين في شعرهم جيل من أبو جنيه، أصل خللي بالك العيال المهمومه دي أحسن ناس ترقص لما بياخدوا الفرصة بيولعوا الفرح هيصة، ويقلبوها هيستيريا.
> ودلوقتي؟!
خلاص بقي لما جيت هنا المرج، الفرقة فركشت الواد سيد اشتغل تباع علي ميكروباص وبقي يغني ويتنطط برضه الهرم رمسيس، رمسيس الهرم، والواد محمد راديو اشتغل في القهوة إللي كان بيقعد عليها، ودي كانت حكايه مسخره.
أصل كان دايماً بيشرب المشاريب علي النوته، وكان دايماً عم حلمي صاحب القهوة يقوله هتلف تلف ياحوده وهتيجي تشتغل عندي عشان تخلص ديونك.. آه والله.. والباقيين طلعوا أندال، مفيش حتي (مسد كول) بعد ما الفرقة فركشت، وأنا زي ما إنت شايف فتحت المحل ده واشتريت (D.J) فول أوبشن عدة كاملة بـ 20 ألف جنيه. الفلوس دي كنت ناوي اتجوز بيها قبل ما الدنيا تغلي لكن دلوقتي خلاص الدنيا ولعت أكتر من اتخن فرح، ده غير إني أنا اصلاً معدتش عايز أتجوز، كفاية عليا قوي اطلع بالـ (D.J) في الأفراح وارقص البشريه وافرح العروسة واحقد علي العريس وأقبض وأجرتي وأحاسب التاكسي بعد ما يجيبني هنا تاني.
>.........؟
كلهم بيقولوا كده بس أنا استجدعتك قوي وليا عندك طلب اكتب حكايتي كويس وقوللي هتنشرها إمتي علشان أشتري الجرنال، وأبعت حد يوصله للبنت اللي كنت باحبها يمكن تطلعني من دماغها وما تجرحنيش تاني، أصل أنا كل يوم بأحلم إنها بتبعتلي حد مشفتهوش قبل كده علشان يتفق معايا علي فرح ولما أروح الفرح اكتشف إنها هي العروسة، أقوم من النوم مفزوع وأبقي عايز آجي المحل افتحه وأشغل الـ (D.J) وأقعد أرقص وحدي في الشارع وأصحي الخلق من النوم الساعة 6 صباحاً، وأحياناً سبعة، علي حسب ميعاد الحلم بقي.
>.....؟
لا. لا. بعد إذنك معلش، صوره لأ.. كفاية بس تكتب أحمد (D.J) مواليد فيصل يعمل ويقيم بالمرج